《忽然1周》 第 364 期 2002年7月19日

留言集
豪 語 錄 　 陳 豪

人 生 最 重 要 的 是 甚 麼 ， 有 人 說 名 利 ， 有 人 說 愛 情 。
陳 豪 會 說 ， 時 間 。
出 道 八 年 ， 拍 過 30 多 部 電 影 ， 電 視 劇 也 拍 了 6 套 ， 照 理 ， 怎 樣 也 不 算 是 新 人 。
但 偏 偏 ， 陳 豪 就 像 個 新 人 般 ， 到 今 時 今 日 才 真 正 為 人 熟 悉 。
有 人 歸 功 於 曹 丕 的 奸 詐 嘴 臉 ， 有 人 認 為 多 姿 多 彩 的 緋 聞 才 是 上 位 關 鍵 。
是 甚 麼 原 因 都 好 ， 陳 豪 也 懶 得 去 理 。
當 年 沒 有 好 好 把 握 機 會 ， 曙 光 初 露 ， 接 著 的 原 來 不 是 一 片 萬 里 晴 空 ， 而 是 一 陣 陰 霾 風 暴 。
娛 樂 圈 向 來 都 是 現 實 的 ， 曇 花 一 現 的 例 子 多 的 是 ， 能 再 次 竄 紅 的 ， 沒 有 幾 多 個 。
新 人 也 好 ， 舊 人 也 好 ， 只 要 觀 眾 能 有 機 會 再 喊 你 的 名 字 ， 應 該 捏 一 把 汗 。
今 天 ， 31 歲 的 陳 豪 ， 依 然 有 滿 腔 豪 情 壯 語 ， 誓 要 把 握 時 間 ， 重 新 開 始 。

好 過 做 師 奶 殺 手

昂 藏 6 呎 1 吋 的 陳 豪 ， 說 話 時 溫 文 爾 雅 ， 還 十 分 愛 笑 ， 與 曹 丕 那 種 狠 辣 ， 完 全 是 兩 個 模 樣 。 對 於 近 期 的 緋 聞 ， 他 笑 著 照 例 否 認 。
「 花 旦 殺 手 ？ 哈 ！ 哈 ！ 第 一 次 傳 我 緋 聞 ， 就 安 個 咁 0既 名 畀 我 ， 我 都 唔 知 自 己 幾 時 變 0左 『 殺 手 』 ， 不 過 都 好 0既 ， 起 碼 好 過 『 師 奶 殺 手 』 ， 或 者 『 阿 伯 殺 手 』 呀 ！ 」
陳 豪 出 道 8 年 ， 最 近 因 曹 丕 一 角 人 氣 急 升 ， 一 時 有 指 郭 羨 妮 主 動 投 懷 送 抱 ， 一 時 又 被 拍 得 出 入 陳 慧 珊 香 閨 ， 似 乎 緋 聞 比 真 人 更 引 人 入 勝 。 陳 豪 也 不 否 認 ， 自 己 新 聞 價 值 高 了 ， 是 件 值 得 慶 幸 的 事 。
「 可 能 我 份 人 好 簡 單 ， 以 前 從 來 冇 乜 記 者 訪 問 我 ， 因 為 根 本 冇 0野 好 寫 。 依 家 《 洛 神 》 反 應 好 ， 0的 人 先 搵 個 talking point 0者 。
「 我 唔 覺 得 我 特 別 受 女 藝 人 歡 迎 ， 可 能 我 講 說 話 語 氣 比 較 斯 文 ， 好 多 人 都 鍾 意 同 我 傾 偈 ， 先 有 咁 0既 錯 覺 0者 。 」
對 於 郭 羨 妮 與 陳 慧 珊 ， 陳 豪 坦 言 兩 位 都 是 好 朋 友 。

「 我 知 郭 羨 妮 畀 人 叫 做 『 生 電 王 』 ， 但 我 又 唔 覺 佢 電 我 喎 。 （ 係 咪 你 收 唔 到 ？ ） 哈 ， 你 0地 個 個 都 係 咁 問 ， 可 能 啦 ， 但 我 自 問 真 係 冇 乜 畀 佢 電 過 。 我 同 郭 羨 妮 其 實 好 熟 ， 自 我 簽 0左 TVB 之 後 已 經 同 佢 合 作 過 4 套 劇 ， 要 有 0野 一 早 都 有 啦 ！
「 至 於 Flora （ 陳 慧 珊 ） ， 可 能 大 家 都 係 外 國 返 0黎 ， 比 較 0岩 傾 0的 ， 同 我 本 身 鍾 意 靜 0既 性 格 都 幾 夾 ， 但 我 0地 真 係 冇 拍 拖 。
「 咁 多 年 ， 我 當 然 好 明 白 娛 樂 圈 0既 遊 戲 規 則 ， 你 有 價 值 先 有 人 講 你 。 依 家 我 會 視 緋 聞 為 我 工 作 0既 一 部 分 ， 有 需 要 0既 話 咪 解 釋 囉 ， 對 我 冇 乜 影 響 。 」
陳 豪 斬 釘 截 鐵 地 否 認 緋 聞 ， 原 因 是 他 已 有 一 位 拍 拖 多 年 的 馬 來 西 亞 籍 女 友 ， 兩 人 雖 然 分 隔 異 地 ， 但 感 情 要 好 。
「 佢 知 道 我 有 緋 聞 梗 係 唔 開 心 啦 ， 有 邊 個 女 仔 會 想 見 到 自 己 男 朋 友 有 緋 聞 先 ， 但 好 在 佢 信 任 我 。 我 有 個 信 念 ， 就 係 只 要 兩 個 人 真 心 相 愛 ， 無 論 分 隔 幾 遠 ， 最 終 都 會 0係 埋 一 齊 。 」
談 到 女 友 ， 陳 豪 一 臉 靦 賟 ， 他 總 覺 得 ， 堂 堂 大 男 人 ， 口 中 若 是 經 常 掛 著 兒 女 私 情 ， 也 未 免 有 點 那 個 。
「 所 以 我 依 家 會 盡 量 唔 講 私 人 0野 ， 希 望 大 家 留 意 下 我 0既 演 出 。 」

做 主 角 以 為 好 叻

陳豪（圈內）首次拍電影便做《晚九朝五》的男主角。他自言當時貪玩，沒有珍惜其後的演出機會。

陳 豪 的 而 且 確 非 常 在 意 他 的 事 業 ， 畢 竟 已 31 歲 了 ， 從 前 年 少 氣 盛 ， 蹉 跎 了 太 多 歲 月 ， 到 了 今 時 今 日 ， 事 業 才 算 是 正 式 開 始 。
「 94 年 我 在 澳 洲 讀 完 大 學 第 二 年 會 計 ， 返 香 港 放 暑 假 ， 最 初 諗 住 做 model 玩 下 ， 後 尾 《 晚 九 朝 五 》 開 拍 ， 監 製 陳 可 辛 經 model 公 司 搵 0左 我 做 男 主 角 。 嘩 ， 一 開 始 拍 戲 就 做 男 主 角 喎 ， 當 時 不 知 天 高 地 厚 ， 覺 得 自 己 好 叻 。
「 當 時 淨 係 掛 住 吃 喝 玩 樂 ， 淨 係 識 搵 錢 ， 有 戲 搵 我 拍 ， 我 會 睇 錢 多 過 睇 劇 本 ， 事 實 上 0個 時 賺 錢 又 真 係 幾 容 易 ， 拍 一 套 戲 有 萬 零 兩 萬 蚊 ， 行 一 次 catwalk 又 有 5 、 6 千 蚊 ， 開 幾 日 工 就 可 以 有 排 唔 使 做 … …
「 最 記 得 有 一 次 同 女 朋 友 出 街 食 飯 ， 我 0地 首 先 上 山 頂 食 0左 800 幾 蚊 生 蠔 加 白 酒 ， 頭 盤 0黎 咋 ， 跟 住 再 去 鯉 魚 門 食 0左 成 千 蚊 海 鮮 ， 最 後 返 蘭 桂 坊 飲 酒 ， 0的 錢 就 係 咁 用 0左 去 。 」
陳 豪 訴 說 著 昔 日 的 奢 華 生 活 ， 沒 有 一 絲 眷 戀 ， 反 而 有 點 自 慚 形 愧 。
「 頭 幾 年 就 係 咁 渾 渾 噩 噩 過 0左 ， 冇 畀 心 機 做 0野 ， 後 尾 拍 拍 下 ， 由 主 角 變 成 大 配 角 ， 再 變 做 二 、 三 線 ， 最 後 淨 係 得 客 串 ， 點 解 我 會 變 成 咁 ？ 跟 住 先 識 問 自 己 ， 係 咪 我 缺 少 0左 0的 乜 ？
「 好 似 99 年 拍 《 特 警 新 人 類 》 ， 我 做 個 衰 差 佬 ， 當 時 我 0係 呢 行 已 唔 算 新 人 ， 但 可 能 對 手 係 曾 志 偉 ， 我 一 開 始 就 好 緊 張 ， 講 對 白 講 極 都 講 唔 好 ， 一 句 好 簡 單 對 白 NG 0左 十 幾 次 ， 畀 導 演 （ 陳 木 勝 ） 由 頭 鬧 到 尾 。 佢 越 鬧 我 就 越 『 騰 雞 』 ， 導 演 嬲 到 好 似 噴 火 咁 ， 搞 到 志 偉 都 要 幫 我 同 導 演 拍 晒 膊 頭 話 ： 『 唔 好 咁 "慶" ， 新 人 0黎 0者 』 。 0個 一 剎 那 真 係 好 hurt ， 亦 都 好 尷 尬 ， 連 出 道 比 我 遲 0既 謝 霆 鋒 同 馮 德 倫 都 做 得 好 過 我 。
「 0個 時 終 於 明 白 到 ， 拍 戲 數 量 多 少 根 本 唔 重 要 ， 係 你 有 冇 用 心 去 拍 。 」

演 出 電 影 ：

《 晚 九 朝 五 》 、 《 空 中 小 姐 》 、 《 慈 雲 山 十 三 太 保 》 、 《 古 惑 仔 Ⅱ 之 猛 龍 過 江 》 、 《 大 三 元 》 、 《 極 速 傳 說 》 、 《 金 枝 玉 葉 》 、 《 PR Girls 》 等 30 多 部。

電 視 劇 ：

《 妙 手 仁 心 Ⅱ 》 、 《 陀 槍 師 姐 Ⅲ 》 、 《 談 判 專 家 》 、 《 洛 神 》 、 《 帝 女 花 》 、 《 絕 世 好 爸 》

是 時 候 博 一 鋪

陳 豪 無 奈 地 嘆 了 一 口 氣 ， 自 己 錯 過 了 黃 金 歲 月 ， 不 能 怪 誰 。 自 從 兩 年 前 簽 了 無 線 後 ， 一 向 飾 演 奸 角 的 他 終 於 有 機 會 「 改 邪 歸 正 」 ， 每 月 沒 有 豐 厚 收 入 ， 只 是 靠 萬 多 元 月 薪 ， 重 新 開 始 。
「 以 前 我 唔 識 諗 ， 錯 過 0左 好 多 拍 戲 0既 機 會 。 最 霉 0個 陣 ， 試 過 轉 行 ， 走 去 學 人 做 傳 銷 賣 濾 水 器 ， 做 0左 大 半 年 ， 畀 我 睇 清 楚 身 邊 邊 個 先 係 我 真 正 朋 友 ， 有 0的 人 為 0左 避 我 ， 連 手 提 電 話 都 改 埋 ， 後 尾 0的 錢 差 不 多 使 晒 ， 但 又 冇 人 再 搵 我 拍 戲 ， 日 日 坐 0係 屋 企 等 運 到 ， 試 過 100 蚊 要 用 4 日 ， 餐 餐 要 去 麥 當 勞 同 快 餐 店 搞 掂 … … 我 曾 經 同 我 經 理 人 許 愿 講 過 ， 不 如 算 啦 ， 我 返 澳 洲 繼 續 讀 書 。 但 ， 我 又 唔 甘 心 ， 做 0左 咁 多 年 ， 一 0的 成 績 都 冇 ， 實 在 係 對 唔 住 自 己 。 」
在 臨 放 棄 前 一 刻 ， 許 愿 把 陳 豪 引 薦 給 無 線 創 作 總 監 曾 勵 珍 ， 從 此 他 便 像 「 更 生 」 般 ， 過 著 他 形 容 為 「 正 常 」 的 生 活 。
「 有 份 工 ， 有 份 正 式 0既 糧 ， 先 叫 正 常 嘛 ！ 所 以 我 好 感 激 珍 姐 （ 曾 勵 珍 ） ， 因 為 佢 都 唔 知 我 得 唔 得 ， 夠 膽 起 用 我 做 曹 丕 ， 其 實 我 同 佢 都 係 博 一 鋪 ， 希 望 大 家 都 掂 啦 ！
「 我 唔 會 懷 念 以 前 0既 生 活 ， 我 只 係 將 享 受 時 間 提 早 0左 ， 擔 唔 擔 心 錢 ？ 都 冇 錢 ， 點 擔 心 呀 ？ 」 憨 直 的 陳 豪 ， 性 格 樂 天 ， 說 話 中 ， 總 帶 點 自 嘲 。
「 今 時 今 日 ， 我 希 望 人 0地 讚 我 做 戲 好 ， 多 過 請 我 食 生 蠔 囉 ！ 」

咖 啡 VS 柑 桔

陳 豪 愛 看 VCD ， 也 愛 喝 咖 啡 。
訪 問 地 點 在 咖 啡 店 裡 ， 由 《 我 的 野 蠻 女 友 》 說 起 ， 原 來 大 家 都 被 這 個 看 似 簡 單 的 愛 情 故 事 感 動 了 。
「 我 最 深 刻 有 一 幕 個 女 仔 叫 個 男 仔 去 另 一 個 山 頭 ， 一 路 講 一 路 喊 ， 話 佢 0地 將 會 分 開 … … 所 以 我 覺 得 ， 只 要 兩 個 人 係 真 心 相 愛 ， 無 論 相 隔 幾 遠 ， 無 論 分 開 幾 耐 ， 最 終 都 會 0係 埋 一 齊 。 」
陳 豪 剛 才 的 愛 的 宣 言 ， 源 自 於 此 。
喝 著 咖 啡 的 他 ， 還 有 個 夢 想 ， 將 來 儲 夠 錢 ， 回 到 澳 洲 ， 在 悉 尼 海 邊 開 間 cafe ， 像 《 秋 天 的 童 話 》 那 種 ， 看 到 海 也 看 到 日 落 ， 與 咖 啡 香 度 餘 生 。
喝 著 冰 凍 柑 桔 檸 蜜 的 我 ， 此 刻 驀 然 醒 覺 ， 陳 豪 這 個 夢 想 裡 ， 應 該 還 包 括 那 個 無 論 分 隔 多 遠 也 可 以 相 聚 的 人 ， 所 以 即 使 他 現 時 要 與 風 馬 牛 不 相 及 的 人 做 訪 問 ， 也 是 值 得 的 。
臨 別 ， 陳 豪 打 趣 地 邀 請 我 幾 年 後 到 他 的 cafe 坐 坐 。
「 到 時 0黎 試 下 我 手 勢 啦 ！ 」
我 估 我 最 想 聽 的 ， 是 他 說 ： 「 Table For Two ？」

■ 撰 文 ： 林 蕾 　 ■ 攝 影 ： 陳 家 維