《東方日報》——〈紅星花園〉 2003年1月

《東方日報》——〈紅星花園〉 2003年1月18, 19, 20, 21日

陳豪發霉方知要發憤
走紅暴發戶月花十萬

我剛入娛樂圈時候，即給人感覺好「囂張」，因為當時拍了電影《晚九朝五》出來都幾受歡迎，覺得自己幾「掂」，加上身邊人又讚賞，心裡面還想「今年最佳男主角」還不是我？個心態幾好笑，好井底之蛙，但當其時由於市道又好，自己又幾好運，戲疊住兩三組去拍，個人生活好奢侈，好揮霍，將賺回來的錢全部花費去買衫，飲飲食食，完全無為將來打算，無目標，只知道開心去玩，當時又好景，每月都賺到十萬，但錢都用清，買衫要名牌，食飯又要去酒店，身邊成班 Model 朋友都同我一樣，凡事都是向錢看。

自認井底之蛙

但不經不覺，慢慢發現搵我拍戲的人愈來愈少，角色又麻麻地，好多時都演奸角，但自己睇番所做的戲也覺得不太好，跟著開始無戲拍，又接少了 Model 之工作，所以都「霉」 0左一輪，而這段期間，曾經有人對我講一些令我醒覺的說話，叫我不要再「囂張」，做人要沉實，學習欣賞別人好處，不要當正自己是大明星，起初我都聽不入耳，不過漸漸察覺到自己真的簡直是井底之蛙，開始學習留意別人如何去演好戲。

不甘心演奸角

不過正當自己開始醒覺時，找我演之角色都不太好，真的有心無力，做得好亦無用，做布景板及不停做奸角，曾經同人講我做了好多奸角，想做 0下忠，但別人卻說：「做乜 0野忠，個個都要做忠，邊個做奸，做奸咪幾好，做忠成個戇居仔。」當時我聽了後個心入面有種不甘心感覺，覺得自己應不止這樣，當然我沒有說出口。

入無線搵機會

而這段期間，就只有「等運到」，我曾經有想過本身不大適合在這行發展，所以此時同經理人講，我想入無線，好希望可以在無線做到一點成績，當是給自己最後一個機會，得當然好，若果唔得不要緊，就當是離開娛樂圈的最後一步，抱住最後嘗試的心態，因為我真的不想再停留在一個位置，我要進步！

電視劇帶挈陳豪名利雙收

在事業上，入無線確是個轉捩點，因為ＴＶＢ真是幾大膽，第一套就安排我拍《妙手仁心 Ⅱ 》，話說回來，有邊個想到陳豪可以演醫生？又有邊個想到我可以演古裝拍《洛神》？更加有邊個敢找我去搞笑演《絕世好爸》？講真要去演醫生、古裝搞笑等角色起初連自己都驚，但他們對我的信心仲大過我自己所有，因此真的覺得好好彩，好夠運，好感激ＴＶＢ同珍姐的栽培。

呢期好掂好紅

其實一開始想入ＴＶＢ時，珍姐並不想見我，因為當其時又金髮成個電影蠱惑仔 Look ，但接見後，對我都改觀了，知道我個人性格並非這樣，於是珍姐同我講，要在電視立足，首先要改掉電影蠱惑仔 Look ，要增肥，要給人更多的親切感，我聽了這些意見後，慢慢去做好，期間ＴＶＢ裡面有好多人幫我，遇到好劇本，遇上好監製吸收了好多經驗。

現時算是有小小名氣，真的多得ＴＶＢ同多得珍姐，其實我就真的不覺得自己紅，但這兩三個月，身邊有人同我講：「陳豪你呢期好掂，呢排好紅喎！」的確好多人認到我，搵我簽名握手，仲多了一班小朋友及年輕 fans ，我真的想不到；因為我拍《妙手》時有一班中上階級ＯＬ，《洛神》就多了師奶觀眾，到《絕世好爸》就吸引到後生仔，能遇到不同的角色，有機會去給我演，真的好幸運！

學識點樣慳錢

從前甚麼都向錢看，但初初入ＴＶＢ，得幾千蚊人工，雖然好窮，但卻好開心，因為令我明白錢的價值，還使我重新學習怎樣適應社會的生活，學 0下點樣去「慳」，那時候坐巴士，樣樣計到最盡，朋友約出街食飯都唔去，每日平均用五十元，試過一百元用三日都未用完，有朋友話我「發窮惡」添！可能我以前歎過、食過、旅遊過，知道曾經錯失好多機會，所以捱少少真的無所謂。

陳豪三段緋聞大剖白

入 TVB 拍劇後，同幾個合作過的女主角都傳出緋聞，其實我看過周刊的報道後，也拍晒手掌，因為寫到真 0既一樣，又詳細，又動聽，仲好有說服力，真的好犀利！我起初都有想過是否劇集宣傳手法，不過我對緋聞的態度抱住笑 0下就算。

同郭羨妮、陳慧珊及蔡少芬都分別傳過緋聞，其實私底下都真的幾好朋友，與郭羨妮合作得最多，我覺得她是一個好有修養，對人好友善的女仔，是一個好拍檔； Ada （蔡少芬）不用說，是個百分百玩得之人，做戲方面確實無得頂，稱得上「 fit 馬」，拍《洛神》時，她除了演得好亦幫我很多。

至於 Flora （陳慧珊），無論做戲做人，對人對事都是非常好的一個人，不會與人去計較，真的拿個心出來跟人做朋友，依家真的好少見到這種人，更難得她完全無架子，對任何人都將心比心，她算是我最合得來的緋聞女友，我與她的友誼亦不受緋聞影響，大家可能都鬼鬼地幾傾得埋。

「當我姊妹多一點」

其實我同 Ada 、 Flora 都是好朋友，走埋一齊就玩到癲，她們兩個又是好朋友，最搞笑同她們兩個都分別傳出緋聞，起初傳一個時，大家都笑說點解唔傳埋另一個，應該一次過，費事其中一人呷醋啦！但講真我覺得她們當我姊妹多一點。

拍電視劇後，我不再講女友，不講私人感情事，點解呢？試過有次被人跟，對我打擊幾大，畀人影了一張相在沙灘洗下身，話我伸手入下體不知做甚麼，仲話我同一個男人一齊，其實那人是我哥哥。

我並非介意影到私人生活，但入行耐了，開始明白做藝人要給人看到好的一面，健康形象會有更多工作機會，所以要學習避忌，感情事亦不想曝光，因為我個人好強烈需要私人空間。

陳豪健身失底褲　蒲吧被摸大髀

我之前做 Model ，著好多靚衫，有人會覺得我外表是「型男」，但自己就一點都不覺，因為在我心目中稱得上「型男」，要合乎好多條件，包括談吐、經驗，工作方面累積回來的一種味道，需要有責任感，處事世故，經得起風浪等，才算是真正的「型男」，並不是外表靚仔有型就夠。

靚仔睇就好，所以在我心目中，真正「型男」是劉青雲同周潤發，除了演戲出色外， 0個種味道由生活帶出來的滄桑感，非常有男人味，我自己真的未達到。

朱玲玲鍾楚紅最有女人味

至於女性方面，心目中有魅力、有女人味的女士，同樣需要有味道，我覺得朱玲玲同鍾楚紅都好有吸引力，其實內涵都是好重要，好女性化之餘，還要有修養。

其實入行到現在，我並不覺得特別吸引到人，做 Model 的時候都有試過有女仔獻殷勤，但拍戲同演電視劇後，都未察覺到，最好笑的，反而試過吸引到男人。有一次，曾經去做 Gym ，沖沖 0下涼被人偷底褲，之後我行出來怒視四周，當然最後都搵不到真兇。

又有一次，同朋友走去蒲吧，那處好多同性戀者，起初我都不發覺，仲同人傾偈，戇戇居居，點知對方隻手就搭落我大髀上，我先知道，我可能在這方面比較遲鈍了一點，同時，我個人本身無機心，我同樣都覺得別人無機心，但當工作得愈耐，開始發現到並非如此，有些人走過來是有目的，不過我依然覺得這個世界好美好，成日都會給身邊朋友笑我，叫我成熟一點，否則好容易睇錯人。

陳豪口述　記者筆錄