《金枝慾孽》DVD簽名會

日期：6-11-2004
時間：3-4pm
地點：奧海城二期商場 DNA 鋪
嘉賓：陳豪、林保怡、鄧萃雯、佘詩曼、黎姿

我今朝睇報紙，竟然星蹤內無提及今天的簽名活動，心想：大鑊啦！連星蹤都無？會唔會 Mo 唔去呢？(因為之前報紙登了這個活動廣告，嘉賓名單沒有 Mo 的名字。)

大約 12 點幾我執拾東西，剛好睇到這張報紙廣告，睇到搞簽名的地方，於是靈機一觸可以打電話去間鋪問清楚。因為如果 Mo 唔去我就要準備同屋企人飲茶啦！

我首先打 1083 問，對方竟然話沒有這間鋪的電話登記，於是她就給我奧海城的客戶服務台電話，之後幾經轉折終於問到間鋪的電話。

跟住我就打電話問間鋪，怎料響了很久也沒有人應。心想：死啦！無人聽0甘咪 confirm 唔到？我繼續等，終於有人接聽喇！我問：「今日係咪有簽名會？」對方即刻答我：「係呀！你帶套碟0黎就可以拎籌簽名，不過最好早0的0黎，因為好多人。」我心想：我預早在 TVB 網頁內訂了都未有碟呀！之後我再問：「陳豪會唔會0黎？」她答：「除0左張可頤之外，所以人都會0黎呀！」我聽後就立即執拾東西準備出發，之後再聯絡幸太及通知其他會員啦！

我大約 1 點半出門口，2:20 pm 左右幸太打電話給我說她已經到了，當時我還在搭地鐵中，不久也收到新會員 Sam 的來電說正在趕來。大約 2:40pm 幸太打電話給我，她已在停車場出/入口位等緊，她見到黎姿已經駕車進入停車場。之後我大約 2:50pm 才到達與幸太匯合。

大約 3pm 我和幸太在停車場出/入口等了一會，便看到 Mo 駕車出現，我們向他揮手，他見到我們也在車內揮手。之後他駛車進入時經過我們身旁，當時他已經好醒目地調低了車窗，這時幸太遞了一袋東西給他。我就對他說：「Mo，我一早訂0左 dvd 但係未收到貨，我0地無 dvd 無得入去簽名呀！上面好多人我0地入唔到去，我0地0係停車場等你啦！」跟住他就點頭說：「好呀好呀。」

之後他駛車入停車場，我們就上去間鋪睇啦！嘩！真係超多人囉！大約 3:10pm 首先係如妃出場，勁多人大叫，之後到 Mo 喇！之後 Sam 打電話給我說在該鋪門口見到 Mo ，但係都好多人隔住。跟住〈大搜查〉的主持便與 Mo 等人一起走進人群做訪問、影相等。但因為我們沒有提早在鋪門口等，所以好多人已經企了靚位，我們被好多人頭遮蔽了視線根本看不清楚，之後見 Mo 經過，因為太多人叫，所以我們叫他，他也看不到呀！之後我們匯合 Sam，便一起去停車場等啦！

去到停車場不用找便已經看到 Mo 架車，本來我們想站在這裡等他。待活動完結後，他到停車場取車就可以見到我們。一會，有「實Q」巡趕我們走，起初我們"咋咋帝"扮走。但見還有很多時間，於是我們返回商場涼冷氣啦！之後轉個頭我們又走去停車場，這次等了一會，有個「實Q」走來同我們講：「你0地唔好企係度。」我們話：「我0地等人呀！」他說：「我知，你0地等明星丫嘛，但係呢度唔准等人0架！」幸太話：「係個 artist 叫我0地0係度等0架！佢知我0地0係度。有咩事你叫阿 head 同我講啦！」我話：「我0地企埋一邊唔阻0的車啦！」他繼續說：「唔得呀！停車場發生咩事好麻煩0架！總之唔准企係度啦！」跟住個「實Q」猛逼我們走。我邊行邊話：「果度無車呀！我0地企呢度咪得囉！」他又說：「上頭0係閉露電視睇到你0地，call 我0黎叫你0地走0架！你0地唔好令我難做啦！快0的離開呢度啦！」

當時我已經開始焦急，因為我們真的和 Mo 約好在停車場等，萬一他到來看不到我們，我們又再和他玩捉迷藏呀！我邊行邊講：「呢度無閉露電視呀！我0地企呢度啦！」但他仍然窮追不捨要我們離開。我們三個與他幾經擾攘，他還是跟著我們硬要我們離開停車場，當時還有其他兩位 fans 也被他驅趕。

跟住我們返回間鋪睇，見到剩很少人排隊，估計活動好快就完結，當時差不多 4pm。

此時，幸太計劃兵分兩路：她到停車場的出/入口位等，我和 Sam 就返回停車場，萬一那個「實Q」在停車場阻我們，Mo 又走了的話，幸太都可以在那裡截停 Mo 叫他等我們。相反如果沒有「實Q」，我們就可以叫幸太返回停車場一齊等 Mo 啦！

當時間鋪對面的 lift 已經被「實Q」封了，不准我們搭。於是我和 Sam 便要行去比較遠的另一個 lift。我們預時間等了一會，大約 4:10pm 就去停車場，出 lift 一睇。嘩！嚇死！ Mo 架車竟然不見了！但黎姿的車還在，當時停車場內並無其他 fans，這好明顯是 Mo 自己先走。

於是我和 Sam 即刻搭 lift 上番去，之後一出 lift 就聽到幸太來電，她說 Mo 已經駛車出來，叫我們快趕去與她匯合。之後我和 Sam 就要直奔去停車場出/入口位，我跑到去那裡仍看不到 Mo 的車，於是我打電話問幸太在哪裡。

幸太叫我一直行就見到，但我邊跑邊看也看不到她和 Mo 。可能 Mo 見幸太不斷同我講但我仍未到，於是 Mo 對幸太講：「你畀個電話我同阿欣講啦！」(這是幸太之後複述給我聽)

當時幸太在電話中勁叫我快些趕來，因為 Mo 好趕住走。之後我在電話中聽到 Mo 把聲，我即刻大叫：「Mo )))))))))你0係邊呀？我見唔到你0地呀！你唔好走呀！我有0野畀你呀！」(我想畀本《Zip HOMME》雜誌佢，因為本0野勁重我唔想又拎番走呀！)

他在電話中對我說：「你一直行，沿住左手邊就見到0架喇。」我就一邊跑一邊聽他講！之後跑跑0下我就見到他的車，於是我講：「哎呀！我見到你架車喇！我0地0黎緊喇！你唔好走呀！」

收線後我和 Sam 繼續跑去喇！我想我們由商場計都跑了約 200 米呀！真係跑都癲囉！勁辛苦呀！

之後我們跑到去已經變了"傻婆"，當時 Mo 在車內，我估計他想接過我們的東西，他便可以即刻開車走。因為平時他唔趕住走，他會企出車外，倚靠車身站著等我們呀！還有這次他駛車出來後，就駛到距離停車場的出/入口位超遠的地方停車，我想他是怕近停車場的出/入口位會有好多路人，萬一被人圍住便擔誤他的時間呀！

我見到他坐在車內，我向他講：「Mo 今日有新 fans 0黎0左呀！」之後他就從車窗伸手同 Sam 握手。我諗：你唔係想握完手就走呀？於是我再同他講：「你同個新 fans 影張相啦！」之後他便點頭話好，然後開車門行出來喇！

跟住我話：「Mo，我0地去停車場搵你，唔見你架車但 gi gi 架車仲0係度呀！」 Mo 說：「係呀！我早走0左呀！求先有人 call 我，突然要趕通告，我趕住走而家要即刻返去喇！」

我們趕快影了合照，簽了張相便讓 Mo 離開，免得阻他太多時間啦！我只能趁他簽相時，問了他幾句：「你拍完呢套劇(秀才)未呀？」他說：「未呀！仲拍緊。」我：「0甘拍完之後係咪仲有另一套呢？」他說：「之後要拍一套民初劇。」我：「係咪同部羨妮果套呀？」他說：「唔係，果套好後先拍。」本來我想再問他拍什麼民初劇，但見他很趕的樣子，所以沒有繼續問了。

他一上車，便即刻查看他的 Pocket PC，我想他已經被人"追魂call"了。之後他在車內與我們揮手 bye bye 便駛車離開。

跟住我們三人便返回商場內的美食廣場坐下，休息一會及傾談今天發生的事。

後記：

今天原本一切很順利，雖然不能夠排隊拎簽名和影花絮相，但想到可以在停車場等 Mo，以為萬無一失啦！怎料被「實Q」趕我們走，搞到我們失了預算，最後還要跑到氣咳，真係辛苦呀！

不過有件事幾好笑，就是當 Sam 跑到見 Mo 時，大家跑後都喘晒氣，再加上她是第一次這樣正面的望住 Mo，難免有少許緊張啦！當她準備用手提電話想影 Mo 時，竟然找不到電話的鏡頭，Mo 見狀便主動伸手，指著她的電話說：「個鏡頭0係呢度呀！」之後仲幫 Sam 擰埋個鏡頭仔0添！

哈哈！這是 Sam 之後和我分享的趣事，我覺得好搞笑，於是在這裡和大家分享。

今天追 Mo 消了很多卡路里！哈哈~~~

阿欣

〈活動照〉

〈香港圖片在線〉http://hk-image-online.com/