七月份清潔打氣之星

七月份清潔打氣之星

日期：15-07-2003 (下午2時30分)
地點：慈雲山中心
嘉賓：陳豪，陳慧珊
出席 Fans：Dorothy，Man Man，幸太，Ar Sin，Angela，Andrea，Louise

* 特別鳴謝 Peony 提供相片連結！

（由於今次活動ｏ係下午舉行，網主 FunYan 要返工去唔到，所以今次由我[Dorothy] 客串一次寫今次ｏ既分享，希望大家不會介意我ｏ的中文表達能力差啦！哈哈！）

今次呢個活動真係事出突然，因為嘉嘉在活動進行ｏ既前一日先打電話俾FunYan，通知我ｏ地聽日有活動．由於今次ｏ既活動ｏ既時間ｏ係係下午進行，所以好多要返工ｏ既Moses Fans都去唔到，只有我和其他幾位比較得閒ｏ既Fans到場支持Moses．

當日我大約２點就到達慈雲山中心，之後就會合埋Man Man；我ｏ地兩個一路搵緊個台係邊個時都爭ｏ的搵到蕩失ｏ左路，所以我嘗試聯絡杏太，但係點知打極都打唔通，最後發現原來佢個電話今日開始停用．搵左一陣之後，我同Man Man都搵到正確ｏ既活動地點．我地見到已經有好多Fans係度排緊隊，Man Man即刻行左埋去排隊先，而我就去ｏ左搵文具鋪買簽名筆，同埋聯絡嘉嘉，問ｏ下佢會唔會同Moses一齊黎～

ｏ係我搵緊文具鋪個時，竟然俾我撞到嘉嘉，而佢見到我ｏ個時，又問我個台係邊度，我就指俾佢睇，但係佢依然好疑惑（因為當日個台真係好簡陋，其實所謂ｏ既台就只係得一張長檯同埋放左幾行摺椅）．咁我帶左佢去左個台之後，我就繼續留守係出面行黎行去，睇下Moses到未，而Man Man就係排緊隊個時就會合埋Angela，Andrea同埋Ar Sin啦．

隔左十分鐘左右，我就聽到一陣哄動聲，一擰轉面就見到一大堆人由電動樓梯上緊ｏ黎，我只係見到陳慧珊(Flora)出現，咁我就行返埋去，但係又見唔到Moses；ｏ係呢個時候我就見到 Louise 同埋幸太，原來 Moses 已經係人群之中入ｏ左活動範圍啦．原來剛才幸太同 Louiseｏ係停車場等 Moses，同 Moses 傾左一陣計同埋影相，佢ｏ地話好正，因為當日係 Lousie 生日，所以 Louise 要求 Moses 叫埋 Flora 同 Louise 一齊合照，Moses 一口應承便下車叫 Flora 和 Louise 三位一齊合照，令到 Lousie 好開心．而幸太又送上很多獨立小包包裝ｏ既 Temxx 紙巾及一壺由幸太親手煲ｏ既冬瓜水俾 Moses消暑抹汗．

原來今次活動係要擔任清潔大使ｏ既 Moses 同埋Flora巡視一ｏ下呢個商場ｏ既衛生情況，所以 Moses 同埋 Flora 到達不久之後，就一行幾十人出巡到商場各層負責巡視工作，當時情形真的很混亂，記者們有記者們ｏ既互推互撞爭相採訪，保安人員有保安人員的保護 Moses 同埋 Flora，Fans 們就有 Fans 們的你撞我撞去跟著 Moses 同埋Flora．由於情況實在太混亂同埋太迫，所以我ｏ地就係返原來ｏ既活動地點附近行來行去等返Moses等人行返來，點知行行下，俾我地撞見返嘉嘉，原來佢因為迫得太緊要，所以跟不上 Moses 等人，於是我ｏ地同埋嘉嘉就傾左一陣就返回活動地點等 Moses回來．

過了太約20至30分鐘左右，Moses 等人就返回原有ｏ既活動地點接受在場ｏ既記者訪問，而我地唯有係人群中等活動結束之後可以同 Moses 傾到計．過左一陣，嘉嘉就行埋黎話俾我ｏ地知 Moses 就走，叫我地落定停車場唔好留ｏ係呢度同其他迫．於是我ｏ地就由幸太帶路，一行6至7個人就一齊落停車場等 Moses．我ｏ地搵到 Moses 架車之後，就不停係度"研究"架車，因為佢架車實在太污糟，同埋車箱入面實在太亂，連手提旅行ｏ急都有一個！哈哈！！

無幾耐之後，我先見到 Flora 落到黎停車場，於是我ｏ地就諗 Moses 都應該會好快就落黎，所以我ｏ地就準備晒相機，照片俾 Moses 簽名;Moses 終於都出現，我當然唔執輸，一於做一做攝石人，一"攝"就"攝"ｏ左去 Moses 隔離，叫佢幫我簽ｏ左之前影ｏ既合照同埋照片～由於停車場係無檯俾 Moses 幫我ｏ地簽名，於是 Moses 就行埋去佢自己架車ｏ個度，將佢架車ｏ既車頂變成臨時ｏ既簽名檯～～本來 Man Man 想考ｏ下Moses 仲記唔記得佢叫咩野名，但係之前我幫Man Man遞相時就已經對 Moses 講呢幾張相係 Man Manｏ家～所以到 Man Man 問 Moses 記唔記得佢叫咩野名個時，佢梗係答得出個正確答案啦～我又再同 Moses 講，問佢有冇返公司睇下我ｏ地錄俾佢ｏ既「完美
情人」選舉 Video，Moses 話未睇，但係有機會都會叫同事俾返佢睇下我ｏ地錄ｏ左ｏ的乜野俾佢睇．Moses幫我簽完ｏ的相之後，我就同佢講，我話我都係行開一ｏ下，費事阻住其他 Fans 同你傾計簽名，Moses 就笑笑口對住我，真係俾佢ｏ既笑容 Lum 死！

我行開左之後，當然就係舉機不停幫 Moses 影相啦～佢一路簽名之餘，得閒都會望下我ｏ地ｏ的鏡頭，俾我ｏ地影下佢．之後 Moses 差不多為其他 Fans 簽完名之後，就開始同我ｏ地逐個逐個合照；ｏ係呢個時候，ｏ係隔離ｏ既 Flora 就開車離開，而Floraｏ既 Fans 就行埋過黎 Moses 呢邊趁熱鬧，有幾位 Flora Fans 更叫 Moses 同佢ｏ地合照簽名，Moses都一一答應照做～

差唔多到尾聲時，嘉嘉便過來對我ｏ地講：Moses要走啦，因為之後Moses有事做，叫我ｏ地快ｏ的搞掂，所以我ｏ地都唔想阻住 Moses，所以很快就同 Moses 講 Bye Bye及目送 Moses 開車離去．

後記：

其實今日個活動就比較悶同埋混亂，因為無乜野做，只係叫 Moses 同埋 Flora 行了幾個圈之後，佢ｏ地接受記者訪問．不過活動完ｏ左之後 Moses 就ｏ係停車場度同我ｏ地傾計同埋影相！Moses 真係好好人！佢明知自己之後有事做，佢都慢慢耐心地逐一幫我ｏ地簽名影相．不過最無奈ｏ既都係 Moses 依然都係唔記得我叫做乜野名囉，所以我決定左每次去活動都會問 Moses 我係邊個叫咩野名，務求煩到佢記得我叫做咩野名為止～哈哈哈哈！～

Dorothy~